نجح فريق من الجراحين الأمريكيين في زرع كلية خنزير في جسم مريضة دون أن يرفض جهاز المناعة العضو
المزروع، في تقدم علمي كبير قد يفتح الأمل أمام الكثيرين ممن يحتاجون إلى زراعة كلى.
من 3 أيام العالم كان على موعد مع انتصار علمي جديد وفي غاية الأهمية هيغير معايير واحدة من أهم
الجراحات الطبية وهي زراعة الأعضاء.. الموضوع للي لسه مايعرفهوش إن فريق طبي مكون من جراحين
أمريكيين من مركز “لانغون” الطبي في جامعة نيويورك قدروا يزرعوا كلية خنزير في جسم إنسان بدون ما
جهاز المناعة البشري يرفض العضو المزروع زى ما كان بيحصل قبل كده في أى محاولة لنقل عضو حيواني للبشر!..
السيدة اللي استقبلت الكلية الجديدة هي مريضة متوفية دماغياً، وتم أخذ موافقة أسرتها على زراعة كلية
الخنزير في جسمها، وتم ربط الكلية الجديدة بالأوعية الدموية للمريضة مع الحفاظ عليها بره الجسم ودي
كانت فرصة عظيمة للباحثين عشان يتعاملوا معاها عن قرب!..
الإنجاز ده مهم لإن العلماء اكتشفوا إن الكلية بمجرد ربطها بالمريضة بدأت تشتغل بكفاءة طبيعية كإنها كلية
بشرية بالظبط لدرجة إنها انتجت كمية بول زى اللي بينتجها أى إنسان!.. حتى مستوى الكرياتينين غير
الطبيعي اللي كان في جسم المريضة بسبب ضعف وظائف الكلى رجع تاني لطبيعته بعد عملية الزرع!..