بعد ما خلصت فترة النيابة فى قسم الجراحة العامة اتعينت على طول معيد لانى كنت من العشرة الأوائل على دفعتى ..دفعة ٨٣..( الثالث على الدفعة ).
ثم بعد ذالك مدرس مساعد جراحة …ولانى كنت مرتبط جدا باستاذى ومعلمى ا د حسن العوضي لانى اشتغلت مع سيادته نائب فى وحدته فى هذا الوقت ….شار على انى اسافر بره مصر واعمل دكتوراه فى الخارج …..وبالفعل بدأت أولى الخطوات اخدت موضوع رسالة دكتوراة على التغذية الصناعية فى مرضى الجراحة.
وعملت بروتوكول محترم فى طرق بحث تخلص كلها بره مصر ….اشرف على ا د حسن العوضي وا د عمرو حلمى ….وطلب منى ا د حسن ان ابدا فى مراسلة الجامعات خارج مصر علشان اجيب خطاب موافقة من استاذ أجنبى للإشراف على الرسالة …..ارسلت مجموعة خطابات للخارج ….كان وقتها مافيش نت ولا موبيلات…..كانت الوسيلة الوحيدة للتواصل الفاكس ….كنت اكتب الجواب ويراجعه لى الدكتور حسن ….واذهب إلى مكتب استاذنا و والدنا الكبير ومعلمنا كلنا وصاحب الافضال علينا كلنا المرحوم ا د / محمد عبد اللطيف…..الاستاذ ….كان أيامها الاستاذ رئيس جامعة …ومكتبه كان مفتوح لنا كلنا ….كنت اذهب الى المكتب ارسل الفاكس ….واخد الفاكسات ال جاية ….لحد ما استقريت على بروفيسور من جامعة اوكلند فى نيوزيلندا….دى جنب استراليا ….والراجل وافق على اضافته على الإشراف…..والاستضافة فى جامعة اوكلند .
مرت الايام بسرعة ….وبدأت فى إجراءات السفر إلى نيوزيلندا…..وبدأت رحلة الحصول على التأشيرة……كانت وقتها نيوزيلندا دى ليس لها سفارة هنا فى مصر ….كنت اذهب الى سفارة انجلترا …..اعمل كل الورق هناك ….اخدت اجازة من الجامعة ….وبفضل الله الاستاذ ( ا د محمد عبد اللطيف ) وافق على تحمل الجامعة تذكرة الطيارة للسفر إلى نيوزيلندا…..والناس مشكورين فى الجامعة وقتها عملوا كل حاجة ليه بسرعة علشان عارفين انى …ابن من أبناء الجراحة ….يعنى تابع للأستاذ…..مرت الأحداث سريعة جدا …..وعملت كام مشوار للخارجية ….وللأسف كانت هناك مشكلة فى الفيزا….جهزت الشنطة ….وحاولت ….وجاهدت….علشان الحصول على الفيزا…..فى هذا التوقيت.
المهم ..كنت رايح محاضرة مع استاذى ا د عمرو حلمى ….لطلبة نهائي طب ….وانا فى المدرج ….وقعت عينى على بنوته جميلة جدا ماسكة وردة فى يدها …جالسة فى الصف الاول امامى على طول..وهنا ارسلت عينى إشارة إلى القلب …..بدأت ضربات القلب ….تشتغل …..يا الله…..وبعدان ….انا عايز اسافر …..اجمد كده ….فات أسبوع وقابلت نفس الطالبة فى قسم الجراحة بالصدفة …..واذا بعينى وقلبى …..ينشغلان بها …..اقتربت منى ….تحدثنا …..عرفت منى موضوع السفر …..واذا بها تفاجنى بأن مصر احسن كثير وخليك هنا ….وربنا ح يكرمك….عدى اليوم …..وسافرت مصر لمحاولة انهاء الفيزا…….ولكن كانت ارادة السماء تقول لى ….مش ح تسافر ….صعوبات كثيرة حدثت فى الحصول على الفيزا.
واتذكر كلام البنوتة الجميلة ….طالبة نهائ طب وهى تقول لى ….بلاش تسافر …..حاولت فى وزارة الخارجية ….ولكن كانت الأوراق المطلوبة من نيوزيلندا كثيرة جدا …..المهم ….دارات الايام … وباظت السفرية ….ورجعت التذكرة للجامعة .
وهنا لا أنسى فضل الأساتذة المشرفين على الرسالة والبروتوكول…….وجاءت نصيحة شخص مهم كنت قابلته فى الخارجية ..عن طريق حد معرفة…قال لى لو عايز تسافر نيوزيلندا……عندى أصدقاء مصريين مقيمين فى نيوزيلندا و عايشين فى مصر هنا اجوزك بنت من عندهم……ورجعت من الخارجية على بيت دكتور حسن فى مصر الجديدة…..حكيت لسيادته ما حدث …..وعلى الفور اخد القرار….لا طبعا … انا مش موافق تعمل كده ….كانوا اباء بمعنى الكلمة …..وباظت السفرية … وخلصت الدكتوراة هنا فى مصر بدعم اساتذتى العظام الكبار …..والدرس هنا ….انه كان فات سنة على تسجيل البروتوكول……وطرق البحث مش موجودة فى مصر …..وربنا يكرمهم ….وافقوا على عمل الرسالة هنا بطرق مصرية.
فاكر كويس ان د حسن قال لى يا ابنى ح نسجل من الاول ….ده وقت ح يضيع عليك …..احنا ح نعمل الرسالة هنا مع بعض التعديل …..شوفوا الأساتذة زمان كان قلبهم على الطالب ….كانوا اباء بجد .
وربنا اكرمنى خطبت البنوتة الجميلة دى …..ثم تزوجنا وانتصرت د نيفين على نيوزيلندا…….وتبقى سفرية نيوزيلندا ذكرة ومحطة فى حياتى ….ومرت الحياة …..والحمدالله .
زوجة صالحة مؤمنة ذاكرة ساجدة …..ادارت حياتى …..قدمت كل الدعم لى … اعانتنى على مصاعب الجراحة ..جزاها الله عنى خيرا ……..وترجع لنا بالسلامة من الحج.
ا د / علاء خليل…..
استاذ سينيور جراحة الأورام بالزقازيق