اقف في الطابور وتقف ساكت ماتتكلمش … لو سمحتي عندى منشأة وعاوز أدفع التأمينات” آخر شباك”
الشباك واقف عليه واحد بس فقلت كويس مفيش زحمة وقفت في الدور ومر وقت حوالي تلت ساعة واللي قدامي زي ما هو و ملاحظ انه مفيش أي تعامل معاه من جانب الموظف والطابور زاد ورايا سألته هو بيعمل لك حاجة قال لأ هو قال لي استنى وبقالي مدة واقف فناديت على الموظف يا أستاذ فلان احنا واقفين بقالنا ساعة وحضرتك مبتعملش حاجة.. رد بصوت عالي جدا وبطريقة فيها استعلاء ( انت واقف بقالك ساعة؟) قلت( أنا بقالي تلت ساعة واللي قدامي قبلي بكتير وانت سايبنا) رد بطريقة أسوأ من اللي قبلها ( اقف في الطابور وتقف ساكت ماتتكلمش)!!
قلت ( مااتكلمش ؟! لا بقا أنا مواطن وانت هنا لخدمة المواطنين) طبعا اشتغل في ثواني صرف اللي قدامي وانا فاهم كويس ولامح من نظراته وتعصبه انه عاوز يخلص اللي قدامي ويروق لي عشان يصرفني من غير ما ينجزني _ وما أكثر الحجج عند اللي زيه عشان يخلص من المواطن الغلباوي اللي فاكر نفسه ناصح وبيطالب بحقه ده !! _ ولسان حاله بيقول تعالالي ياخويا!! _ نعم اتفضل _ قلت له اهدي كده وصلي على النبي _ قال أهدى؟! مش انا هنا لخدمتك؟ قلت آه أنا وكل المواطنين _ والله أنا عندي منشأة وعاوز أدفع التأمينات _ تاهت ولقاها وقال _ روح ادفع في فوري _ لا أنا عاوز ادفع هنا _ مفيش دفع هنا _ طيب عاوز اعرف هدفع كام؟ هات رقم المنشأة _ اتفضل _ مين صاحبة التأمين؟ دي زوجتي وبطاقتها اهه واسمي فيها _ لا هي اللي تيجي يا إما تروح لأي بتاع فوري يقولك عليك كام!!
وهكذا صرفني بالروتين وربما ضيع هو وأمثاله في كل مصلحة على الدولة ملايين وربما مليارات..
طبعا أنا مش هقول اسمه عشان أنا مش مؤذى وربما يراجع نفسه ويشتغل ويحترم المواطن..
اقف في الطابور وتقف ساكت ماتتكلمش!!
بقلم: الأستاذ خالد البغال