الإسعافات الأوليه وطريقة التعامل مع حالات الإغماء اللى بنقابلها يوميا أصبحت شىء مهم جدا
لو مسافر فى طريق أو ماشى فى الشارع أو لاقدر الله حد من أفراد أسرتك فى البيت وقع مره واحده ومتعرفش هل أغمى عليه أو حدث توقف فى القلب.
علشان تفرق بين الحالتين لازم تعمل بعض الحاجات:
أولا
تخبط بأيدك على كتف المريض وتنادى يا أستاذ (يا أستاذة) أو تناديه بأسمه لو تعرفه.
ثانيا
لازم تتأكد أن المريض بيتنفس وده يحصل عن طريق إنك تحط خدك عند أنف المريض وتحس بخروج النفس وفى نفس الوقت تبص بعينك من الجنب على حركه القفص الصدرى (لو شوفت المريض قبل ما يوقع ولاحظت أنه بلع حاجه قفلت ممر الهواء لازم تحاول تطلعها سواء بأيدك أو عن طريق الضغط على أعلى البطن بأيدك الاتنين من خلف المريض).
ثالثا
حاول تحس نبض شريان الرقبة و دة هتلاقيه جمب تفاحة أدم بتاعة الزور و حسه بصوباعين إتنين عشان تعرف تحسه أو تحسه من شريان اليد لو عندك أى خبره سابقه.
لو مفيش اى حاجه من العلامات ده إبدأ الإنعاش القلبى الرئوي مباشرة(CPR) وده بيحصل كالأتى:
– إستدعى مباشرة أقرب شخص ليك للمساعده وأطلب من أى شخص قريب منك إنه يطلب الأسعاف.
– ابدأ مباشرة بالضغط بأيدك الاتنين فى منتصف الصدر(تحديدا الجزء الاسفل من عضمة القص) وعد بصوت عالى 30 عدة ومع الضغطه لاحظ إن الصدر بينزل معاك تقريبا 5 سم.
– بعد كل 30 عدة إنت أو لو حد بدأ يساعدك إفتح ممر الهواء بتاعه عن طريق إنك بتفرد الرقبة علي الأخر كأن الشخص باصص للسما اوي وحط منديل على فتحه فمه وأنفخ فى فمه مرتين وتلاحظ حركة القفص الصدرى واضحه قدامك.
إستمر فى عمل 30 ضغطه على الصدر يعقبها إعطاء النفس مرتين (نسبة 30:2) إلى أن يصل الفريق الطبى لإستكمال الانعاش.
إنك تبدأ إنعاش المريض بدرى وبشكل صحيح ده هيزود بإذن الله فرصه إنقاذ حياته.
أما لو لسه بيتنفس و النبض موجود يبقي عايش الحمد لله وده إغماء والتصرف فى الحاله ده هيعتمد على:
– لو المريض حصل له إغماء بعد حادثه حاول متحركش المريض لو معندكش خبرة سابقه لإن النقل الخاطىء يفاقم المشكله أما لو عندك خبرة فأنت و شخصين تانيين تحركوا المريض كوحده واحده بالشكل الصح إلى أقرب مكان آمن.
– لو الإغماء حصل بدون حادثه فأشهر أسباب الإغماء هي إرتفاع أو إنخفاض حاد في السكر. إرتفاع أو إنخفاض حاد في الضغط. جفاف أدي إلي هبوط في الدورة الدموية وخصوصا فى كبار السن. حدوث جلطه أو نزيف فى المخ. كتير من أمراض القلب زى الجلطه الحادة للقلب او أضطراب فى ضربات القلب (أنسداد فى الضفيرة العصبيه او رجفان أذينى او……). بعض الإضطراب فى وظائف الغدد الدرقية. إضطراب فى الحالة النفسية (وده نسبه ليست بالقليله وخصوصا فى الشباب). غير أسباب تانيه كتير
-هنتكلم تفصيليا عن كل سبب من الأسباب ده وإزاى نفرق ونتعامل مع كل موقف لإنقأذ حياة مريض.
– دورة ألإسعافات الأوليه أصبحت أولويه ومعظم دول العالم تفرض الحصول على تلك الدورة للحصول على وظيفة بالإضافه إلى توفير مستلزمات الإنعاش القلبى الرئوى فى كل المصالح الحكوميه وعلى الطرق السريعه وإشارات المرور نظرا لأهميتها ومساعدتها فى إنقاذ حياة كثير من المرضى.