دخلت انام علشان عندى شغل الصبح …للأسف الموبيل جنبى …وانا عادة موبيلى مفتوح على طول وخاصة لو كان فى عمليات …اخاف حد يتعب …ويتصل على ….ويلاقي الموبيل مغلق .
فجأة رن الموبيل فى الوقت المتأخر ده ….قلقت بعد ما كانت عينى غفلت خلاص …صحيت بسرعة ارد …خير يا افندم .
صوت راجل يتحدث بأدب شديد ….انا اسف يا دكتور علاء ….خير يا افندم ….والله باعتذر للاتصال المتأخر ده .
لا….خالص …اتفضل …قال لى الناس كلها قالت لى حضرتك رجل خير وبتساعد ولادك الدكاترة فى مشاكلهم ….تحت امرك .
قال لى اعطل حضرتك دقيقتين….قلت له..دقيقة واحدة علشان انا نمت فعلا….قال لى ابنى مسجل دكتوراة فى أحد الكليات العملية …بلاش نقول الاسم ….ولا الجامعة .
وخلص الرسالة …وراحت للمشرفين الثلاثة ….كويس وبعدان ….اثنين من الأساتذة المشرفين ..راجعوا الرسالة كويس جدا وقالوا لابنى تمام كده …الرسالة صالحة للمناقشة …وبعدين ….قالوا للولد مش ح نقدر نمضى الا بعد الاستاذ الرئيسى….مع العلم هما الاثنين بدرجة استاذ….وبعدين ….الولد راح للأستاذ الثالث الكبير ٦٨ سنة …قال له …عدى على بعد ٣ شهور…..الولد قال له يا افندم …الرسالة خلصت والاساتذة اقروا انها صالحة . وانا جايب لحضرتك نسخة من شهرين ..ومجلس القسم بعد اسبوع …وعايز اخلص لان زملاءى خلصوا ……وانا عدلت كل التصليحات إلى حضراتهم طلبوها ….قال للولد …مش فاضى ….والولد اتعقد خالص ومش عايز ينزل شغله لدرجة انه عايز يقدم استقالته بكرة ….ليه بس كده ….طيب خلى ابنك يكلمنى …..مافيش دقيقة ….والولد كلمنى….سمعت منه المشكلة …..طلع الاستاذ الرئيسى ده …كان بيحب خالته زمان ورفضت تجوزه…..انت عرفت منين ….خالته دى عايشه بره مصر ….امه بتحكي لها أن الولد…مهموم وبعيط…..قالت لها ….اسمه ايه الدكتور ….عرفت الاسم … يا الله….انتى مش فاكرة يا …ام الولد ….إن ده أتقدم ليه وبابا رفضه ….اه…..هوه….ده ….يا نهار ابيض …لسه فاكر ….ده الكلام من ١٥ سنة ….وبعدان …..يا ابنى ….ده ال حصل يا دكتور …..طيب خير ان شاء …..الصباح رباح ويحلها ربنا …..نام يا ابنى وبكرة ….ح اكلم الاستاذ ….وان شاء الله يمضى الصلاحية طالما الرسالة اتراجعت كويس .واشوف وجه نظره ..واسبابه ..وعد يا دكتور ….حاضر يا ابنى ….المجلس بعد اسبوع …حاضر يا ابنى …ح اتصرف ….ممكن نقف هنا ….وان شاء الله بكرة ….موضوعك ده بسيط خالص.
قفل السكة ….ومن وقتها النوم راح من عينى ….ومخى يودى ويجيب ….هو اختيار المشرفين بالطريقة ال احنا ماشيين عليها دى صح …..حاولت اغمض عينى …خايف على الولد ح يقدم استقالته ….وهو على وش مدرس …خطوات …ويبقى مدرس فى الجامعة …..قلبى وجعني.
