طبعا كلنا سمعنا عن مصل الانفلونزا الجديد 2020 /2021 وفي البوست ده هنحاول نبين بعض المعلومات اللي تخصه ومين المفروض ياخده وازاي
المصل ده طبعا مهم ان كل الناس تأخذه من اول عمر 3 سنوات ومافوق لحد عمر حتى لو 100 سنة
خصوصا الناس اللي بتعاني من امراض مزمنة او بياخدو ادوية بتثبط المناعة
مصل الانفلونزا ده عبارة عن بعض سلالات فيروس الانفلونزا الميتة اللي متوقع انتشارها بشكل كبير السنة دي ومتحضرة في صورة حقنة عضل وتؤخذ وقت موسم انتشار الانفلونزا اللي هو من شهر 10 او 11 حتى نهاية شهر ابريل
المصل اللي نزل السنادي وسعره 170 جنيه اسمه Influvac Tetra او بالعربي : مصل الانفلونزا الرباعي، وسموه رباعي لأنه يختلف عن مصل السنة اللي فاتت اللي كان يحتوي على ثلاث سلالات فقط من فيروس الانفلونزا نوعين A ونوع B لكن السنة دي زودوا سلالة رابعة وبقي نوعين A ونوعين B والمتوقع انتشارها في 2020 وحتي 2021
طبعا زي ما قولنا ان الاطفال فوق ٣ سنوات وكبار السن واصحاب الامراض المزمنة وضعاف المناعة دول اهم فئات المفروض تاخد المصل
طيب ايه التوقيت المناسب اللي اقدر اخد فيه التطعيم ؟
بننصح بـ إعطاء المصل في شهر سبتمبر أو اكتوبر حتى شهر أبريل عشان الجسم يقدر يوفر افضل حماية قبل موسم الشتاء الأفضلية فى شهر 9 و 10 و 11
ولكن فى المطلق طوال فترة الشتاء .
طب ايه هيا جرعته ؟
يؤخذ بالتفصيل الآتي :
الأطفال من عمر 3 ل 9 سنوات ولم يسبق لهم التطعيم بالانفلونزا مطلقا … يؤخذ حقنة كاملة وتكرر بعد شهر
الأطفال من عمر 3 ل 9 سنوات وسبق لهم التطعيم بالانفلونزا من قبل … يؤخذ حقنة كاملة ولاتكرر
جميع الأعمار فوق 9 سنوات … يؤخذ حقنة كاملة ولاتكرر
طب ايه طريقة الحقن ؟
افضل طريقة عن طريق الحقن عميقا في العضل
امتى بقي المصل يقدر يوفرلى حماية من فيروس الانفلونزا ؟
المصل بيستغرق فترة من 14 ل 21 يوم عشان يقدر يوفر اجسام مضادة ضد ال4 سلالات اللى اتكلمنا عليهم من ڤيروس الانفلونزا .
طب مين أكتر الناس اللى بننصحهم بأخذ
المصل الرباعى الموجود حاليا؟
بننصح كل الأعمار بأخذ التطعيم الرباعى ابتداءاً من عمر 3 سنوات
مرضى حساسية الصدر والربو الشعبى
أصحاب الأمراض المزمنة زى القلب و السكر والضغط او بياخدو ادوية بتقلل المناعة
مين ممنوع يأخذوا اللقاح ده؟
اللي عندهم حساسية من البيض
اللي عندهم حساسية من لقاح الانفلونزا او احد مكوناته او اخذوا اي لقاح انفلونزا قبل كده وحصلهم حساسية منه
طب ايه الاعراض اللي ممكن تظهر لما الشخص ياخد المصل ؟
المصل ممكن يعمل احمرار وتورم في مكان الحقن وممكن الشخص يظهر عليه اعراض طفيفة شبيهة لاعراض الانفلونزا زي ارتفاع طفيف في درجة الحرارة او همدان بالجسم وكل دي اعراض طبيعية
هل ينفع الحوامل والمرضعات ياخذوه؟
ايوة ينفع في جميع مراحل الحمل واثناء الرضاعة مفيش مشكلة
توضيح هام
غير ممنوع ويؤجل فقط لفترة في حالة كان الشخص درجة حرارتة وقت التطعيم عالية جدا او عنده عدوي حالية
حتي الان لم يثبت اي تفاعلات دوائية للمصل
المصل مالوش اختبار حساسية