الأورام بشكل عام عبارة نوعين أساسين ( أورام حميدة وأورام خبيثة ) والفرق بينهم هو
الورم الحميد:
عبارة عن نمو غير طبيعي للخلايا والخلايا دي ثابتة في مكان معين مش بتنتشر في اجزاء تانية بالجسم، وغالبا النوع ده من الاورام مفيش خطر او خوف منه إلا في حالة لو ظهر في أماكن مهمة بالجسم زي الأوردة الدموية والأعصاب ،، وكمان بيتميز ببطئ النمو وانه مش بيختلط بالدم يعني ممكن التخلص منه تماما بدون رجعة بعملية جراحية وبينتهي بعدها الخوف والقلق ويرجع الشخص لحياته الطبيعية.
الورم الخبيث:
هو نوع اصعب من اللي فات لأنه مش بيكتفي بنموه في مكان ثابت! ده بيفضل يكبر وينتشر بشكل سريع وممكن كمان ينتقل مع الدم إلي الأعضاء الهامة زي الكبد والمخ والرئتين والعظام واحيانا يعتبر من الأنواع المميتة للإنسان ،، لكن في نفس الوقت علاجه في المراحل الأولية مش صعب سواء بالجراحة أو الجلسات ويمكن السيطرة عليه بالمتابعة المستمرة مع الأطباء.
العلاج الإشعاعي للأورام غالباً بيكون مصاحب للعلاج الجراحي والكيميائي
وهو عبارة عن جزيئات أو موجات عالية الطاقة تعمل على تدمير وإتلاف الخلايا السرطانية، لإن الإشعاع يعمل على تدمير الحمض النووي داخل الخلايا فيؤدي إلي وقف نموها وعدم انقسامها وبالتالي يتسبب في قتلها.
والهدف الأساسي من العلاج الإشعاعي هو تقليص حجم الاورام وقتل الخلايا السرطانية،، وبيتم اختيار العلاج الإشعاعي في كل من الحالات التالية:
1- كعلاج أساسي للقضاء على الأورام.
2- لتقليص حجم الورم قبل الجراحة.
3- للقضاء على خلايا سرطانية متبقية بعد العلاج الجراحي.
4- تخفيف أعراض معينة لمراحل متقدمة من السرطان.
5- بالتزامن مع علاجات آخرى (محاربة الورم من الداخل ومن الخارج)
الاستاذ الدكتور احمد علي عبيه
استشاري الأورام بكلية طب الزقازيق
استشاري طب الأورام بالمركز الطبي العالمي