طرح المطرب الشعبى عمر كمال صاحب أغنية “بنت الجيران”، أحدث أغنياته التي تحمل اسم “أيام زمان”، عبر قناته الخاصة على موقع الفيديوهات “يوتيوب” والذى صورها داخل أحد الأستوديوهات، ويأتي ذلك بعد قرار نقابة المهن الموسيقية برئاسة هانى شاكر بمنع مطربى المهرجانات الشعبية من الغناء في الأماكن السياحية وإقامة الحفلات الغنائية
وكان المطرب عمر كمال صاحب أغنية بنت الجيران، أعرب عن حزنه الشديد بعد قرار الفنان هانى شاكر نقيب المهن الموسيقية بعد قراره بمنع مطربى المهرجانات من العمل في الأماكن السياحة وإقامة الحفلات، قائلا، القرار ده دبحنا وبيتى اتخرب ومش عارف أعمل ايه.
وأضاف في تصريحات صحفية، أنا مطرب نقابى حرام يتعمل معايا كده، احنا اعتذرنا على الألفاظ اللى كانت في أغنية بنت الجيران، وعملنا بث مباشر لفيديو مدته 14 دقيقة انا وحسن شاكوش، شرحنا فيه كل اللى حصل في الاستاد، وعندنا استعداد نبوس دماغ أي حد بس عشان تسامحونا.
وتابع، قرار أستاذ هانى شاكر دبحنى وبيتى اتخرب، انا حصلت على دفعات تعاقد من حفلات وحاليا أصحابها كلمونى ومحتاجين يرجعوا كل الفلوس وبزيادة، ده غير ان أصحاب الحفلات بعد كده هيخافوا يتعاملوا معايا تانى خوف ان الحفلة تتلغى فاجأة.
ووجه المطرب عمر كمال صاحب أغنية بنت الجيران، رسالة للفنان هانى شاكر بعد إصداره قرار وقف مطربى المهرجانات من العمل والغناء في الاماكن السياحية وإقامة الحفلات، قائلا، دى أول غلطة ليا وأعتذرت عليها تقوم تدبحنى، ده انا ملحن لك أغنية أبوية، انا عندى شغلى كله خسرته بسبب القرار ده ليه تقطع عيشى طيب، انا بيتى حرفيا اتخرب.