بأحس بعدم اهتمام وتقدير لما اشوف ورق فحوصات خاص بالمرضى جاى من التأمين الصحى ….تمسك ورق
المعامل تلاقيه شخبطة كبيرة جدا …حد بيكتب وهو مستعجل خالص وبخط اليد والخانات متنقله…..وبدون توقيع
واسم المريض ناقص كلمتين ثلاثة ….ويا سلام بقى على تقارير الاشعة ….إبداع….وإضافة….وكلام غير علمى
خالص خالص ….يعنى الورق لو سافر مع مريض السعودية ولا الكويت يقولوا علينا ايه ….متخلفين ….ماشين ورى
الجمال….ليه عدم الاهتمام ده ….فى الوقت ال المعامل ومراكز الاشعة فى الخاص قامت بتحسين الأوراق بشكل
جيد جدا …وغلاف شيك ….وحاجة محترمة ….انا حاسس ان دكاترة المعامل والأشعة فى الصحة والتأمين بيعطفوا
على المرضى ….كويس انكم اخدتوا الورق دى ….والسؤال….هيه الدولة مش بتدفع مليارات الجنيهات فى التأمين
ده علشان المرضى ….الفلوس دى فين ….طور ونظف شغل المعمل …عندك أجهزة اه….بس الاخراج زفت وطين
وتقارير بدون مراجعة ولا توقيع مفهوم ….وخلى بالكم ….ممكن المريض يكون غير قادر على إعادة المعامل دى برة
…ولا الاشعة ….اهتموا يا سادة ….اهتموا بالفينش……اشتروا غلاف وحط فيه التقرير ….واكتب عليه التأمين
الصحى بالشرقية …..دعاية لكم…..وبلاش حد يقول زحمة…..مش مبرر ابدا …..تقارير السونار لازم يكون معاها
صور واضحة ….والدكتور يكتب المؤهل ايه مع التوقيع ….علشان نفهم ….مين الشخص ده ….ونتواصل معاه ازاى
التأمين الصحى علاج الغلابة …بس مش معناها نعاملهم بالطريقة دى كأنهم بيشحتوا …. ده احساسى …يارب
يكون غلط …ليه كده ….
ا د / علاء خليل
استاذ سينيور جراحة الأورام
بطب الزقازيق.