موقع الشرقية نيوز موقع اخبارى شامل جميع الاخبار الحصرية.

الرئيس السيسي يعلن عن إجراءات جديدة للتيسير على ذوى الهمم بحفل “قادرون باختلاف”..

شهد الرئيس عبدالفتاح السيسي، اليوم الأربعاء، انطلاق النسخة الرابعة من “قادرون باختلاف”، وبدأت الفعالية بعرض فيلم تسجيلى بعنوان: “3 سنين.. قادرون باختلاف”، والذى تحدث عن مشاركة الرئيس السيسى عن الاحتفالات الثلاثة السابقة لـ”قادرون باختلاف”، واستعرض الفيلم التسجيلى جهود الدولة المصرية فى دعم ذوى الهمم.

وشهدت النسخة الرابعة، من حفل “قادرون باختلاف”، مشاركة أصحاب الهمم من الدول العربية، حيث شاركت الطفلة مريم حمدان، من دولة الإمارات العربية المتحدة، وعبرت عن سعادتها بالمشاركة.

وقالت الطفلة مريم: “أنا عمرى 11 سنة.. أنا اليوم سفيرة للطفل وأتمنى أن أكون سفيرة لبلادى فى المستقبل.. وحرصت على المشاركة.. وأشكر حضرتك فخامة الرئيس عبد الفتاح السيسى على دعوتى أنا وإخوانى للمشاركة فى حفل “قادرون باختلاف”.. وبنحب مصر أنا والشعب الإماراتى”.

رحب الرئيس عبد الفتاح السيسي، بالطفلة مريم من أصحاب الهمم من دولة الإمارات والمشاركة فى حفل “قادرون باختلاف”، قائلا: “أهلا وسهلا بيكى وبكل أهل الإمارات اللى موجودين النهادرة واللى هناك.. احنا بنحبكم كتير”.

أشاد الرئيس عبدالفتاح السيسى، بأداء الطفل محمد محمود من ذوى الهم، قائلا: “يا محمد يا محمود انت مذيع جميل جدا إنت غلبت الأستاذ كريم“.

وقدم الطفل الحفل بالاشتراك مع الفنان الشاب كريم فهمى، فى حين أعرب الفنان الشاب عن فخره بوقوفه أمام الرئيس السيسى قائلا: “فخور أن أقف قدامك لأول مرة ويارب يخليك لينا ولأطفال مصر”.

عمرو يوسف: الرئيس السيسي يدعم “قادرون باختلاف” ونظرة المجتمع تغيرت

وقال الفنان عمرو يوسف: “أنا مشارك كسفير الاتحاد الرياضى للإعاقات الذهنية من عام 2014 بشكل رسمى.. والرئيس عبد الفتاح السيسى عمل المجهود الكبير اللى خلى أولادنا من قادرون باختلاف حاسين فارق كبير في المجتمع“.

وقالت رحمة خالد بطل مصر في تنس الطاولة: “صباح الخير فخامة الرئيس.. أنا إعلامية فى التليفزيون.. وعندى 26 سنة.. ومن 26 سنة الدكتور قال لماما بنتك مش هتعيش ومش هيكون لها مكان.. والمدرسة مكنتش مش راضية“.

ورد عليها الفنان عمرو يوسف قائلا:”أنتى بطلة رياضية ومذيعة وإعلامية كبيرة.. وأولادنا مسافرين العام المقبل في فرنسا في الأولمبياد”، لترد عليه: “شكرا للرئيس السيسي اللى خلي لينا مكان في الجمهورية الجديدة“.

وتابع الفنان عمرو يوسف: “مجهود كبير ودعكم.. قدوة لكل الناس التعامل بقي مختلف والنظرة والفهم بقي مختلف.. حقيقي بشكر حضرتك“.

وقالت رحمة خالد: “الرئيس حبيبنا .. شكرا مش كفاية.. شهر ديسمبر قادرون باختلاف.. ويؤكد مكان لينا في الجمهورية الجديدة”.

الرئيس السيسي لـ”رحمة خالد” بـ”قادرون باختلاف”: اللى ما بيحبكوش ملوش حظ

أشاد الرئيس عبدالفتاح السيسي، بالشابة المذيعة رحمة خالد “من قادرون باختلاف”، قائلا: “يا رحمة إنتى مذيعة جبارة جدا.. ما شاء الله إيه ده كله ده؟“.

وقالت الشابة المذيعة مازحة: “إيه رأيك؟..ليرد الرئيس السيسي: ” جميل جدا“.

وأضافت رحمة خالد: “والله يا ريس احنا بنحبك.. واليوم ده بنستناه من السنة للسنة.. ودايما بنبقا مبسوطين وانت معانا“.

وقال الرئيس السيسي:”عارفة يا رحمة اللى ملوش حظ اللى ميبحكوش”…لترد رحمة: ” احنا المصريين حظنا كويس إن بقا لينا رئيس إنسان زى حضرتك”.

الرئيس السيسى لأحد أبطال قادرون باختلاف: “مصر بتعدى وبتنجح بفضل الله”

قدم الإعلامى سيف زاهر، أحد الشباب الأبطال خلال حفل “قادرون باختلاف“.

وقال الشاب: أنا اسمى على محمد على عندى 21 سنة بطل سباحة في نادى شباب الجزيرة وبحب الكورة وبحلل الماتشات، وتساءل سيف: يعنى ممكن تحلل معانا؟ ليرد الشباب: طبعا.

أعرب الشاب على محمد علي عن أمنيته فى أن يكون مذيعا، ليرد عليه الرئيس السيسى: يا علي كان ممكن نشوف فقرة عن أحد ماتشات كأس العالم اللى فات وتقولنا فيها كلمة ويبقا قدمناك للدنيا كلها“.

شدد الرئيس قائلا: “”مصر بتعدي وبتنجح بفضل الله.. وهتبقي قد الدنيا إن شاء الله.. لازم نعرف كده إن شاء الله”.

فتاة من “قادرون باختلاف” للرئيس السيسي: “بحبك وبشكرك على دعمك لينا”

قدمت خديجة شعبان الشكر والتقدير للرئيس عبدالفتاح السيسي لحرصه على دعم “قادرون باختلاف“.

عرفت خديجة نفسها: “أنا خديجة شعبان، عندي 19 سنة طالبة في كلية آداب إنجليزى بالجامعة البريطانية .. جاية أشكر حضرتك علشان حضرتك كان ليك الفضل في تحقيق حلم من أحلامي، وهو أن أطلع على التليفزيون.. وبسبب حضرتك بقيت مشهورة قوى“.

وأضافت: “أصحابى في الجامعة بيقولولي يا بختك إنتى اللي الرئيس جابلك الكرسي”.. ليقاطعها الرئيس قائلا: ” دا انا اللى بختى إن جبت الكرسى والله العظيم“.

أكملت خديجة: “انا بحبك وبشكرك على دعمك ليا ولكل القادرون باختلاف”.

الرئيس السيسي يحتضن شابا من “قادرون باختلاف” استجابة لرغبته

شهدت الاحتفالية ” تفاعل أحد الشباب المشاركين من أصحاب الهمم، حيث نزل من مكانه من أجل لقاء الرئيس عبد الفتاح السيسي.

وقال الشباب أمام الرئيس السيسي باكيا: “أبويا وأمي ناس بسيطة.. وأنا مش قادر أتكلم”، وهو ما تفاعل مع الرئيس السيسي واحتضن الشاب واستمع إليه.

شاب من “قادرون باختلاف”: طلباتى بتتحقق من رئيس وحكومة بيقدموا كل الدعم

وقال الشاب محمد مصطفى:”صباح الخير يا ريس.. صباح الخير على السادة الحضور.. أنا محمد مصطفي.. بطل تنس الطاولة فى الاتحاد المصرى للإعاقات الذهنية ونادى الزمالك احنا القادرون باختلاف.. صوتى بيوصل.. طلباتى بتحقق من رئيس وحكومة بيقدموا كل السند والدعم”.

الرئيس السيسي لـ”قادرون باختلاف”: “أنتم أصحاب المكان ومش بجامل والله”

تفاعل الرئيس عبد الفتاح السيسي، مع كلام الشابين مصطفي أحمد من “قادرون باختلاف”، وبطل السباحة، وجنات محمود بطلة سباحة من “قادرون باختلاف”، قائلا: “أنا بحبكم جدا.. هقول لكم على حاجة وليكم للناس في مصر.. شوفوا.. مش بتقولوا لينا مكان.. أنتم أصحاب المكان.. انتم.. وانا مش بجامل والله.. والله ما بجامل و بقول كلام لطيف.. اللى يعرف الحقيقة ويجي يوم يتمني يبقي معاكم.. بس ساعتها قولوا ليكم مكان“.

وأكد الرئيس عبد الفتاح السيسي، على تسهيل كافة الإجراءات للمشاركين من أصحاب الهمم في البطولات الرياضية الدولية.

3 بطلات من أصحاب الهمم يستعرضن بطولاتهن أمام الرئيس السيسى

شاركت الفنانة كندة علوش، مع 3 بطلات من أصحاب الهمم، حيث أكدن أن الأسرة هى التى دعمت ووقفت بجوارهن، قائلا: “احنا لينا لزمة جدا ولينا دور كبير فى المجتمع“.

وقالت الفنانة كندة علوش: “بقدم التحية لكل أب وأم ..وقادرة أتخيل المشوار الصعب.. قادرة اتخيل الدموع والتحدي.. هما الأبطال الحقيقيين.. شكرا سيادة الرئيس.. بفضل قادرون باختلاف.. فخورين بما تحقق لأصحاب الهمم”.

الرئيس السيسي لوالد شاب من “قادرون باختلاف”: “أَفَحَسِبۡتُمۡ أَنَّمَا خَلَقۡنَٰكُمۡ عَبَثٗا”

تحدث الرئيس عبد الفتاح السيسي، عقب عرض فيلم تسجيلي عن بطولات وتضحيات “قادرون باختلاف”، قائلا: “هقول لأبو ياسين.. مش هقول لافت نظري.. أنا عارف أن كل اب مش حتي اللى عنده موقف الاختلاف ده.. أي اب وأم كمان يبقوا دايما بيفكروا في ابنهم وبناتهم.. أَفَحَسِبۡتُمۡ أَنَّمَا خَلَقۡنَٰكُمۡ عَبَثٗا وَأَنَّكُمۡ إِلَيۡنَا لَا تُرۡجَعُونَ”.. كل خطوة وكل نفس في الكون محسوب ومقدر.. والدنيا ماشية بقالها الاف السنين.. بكل حاجة.. لا ده خلص ولا ده راح.. وده مش معناه أن الدولة ملهاش دور.. ولما اتكلمنا عن صندوق “قادرون باختلاف“.

وقرر الرئيس السيسي إنهاء كلمته بعدها من أجل استكمال فعاليات الاحتفالية، نظرا لتواجد أحد الشابات من ذوي الهمم على المسرح.

تأثر الرئيس عبد الفتاح السيسي، خلال مشاهدة فيلم تسجيلي عن تضحيات وبطولات “قادرون باختلاف”، ضمن فعاليات الاحتفالية الرابعة.

وتحدث والد أحد الشباب خلال الفيلم التسجيلي باكيا: “أنا خايف علي ابني لو موت وسبته”.

أشرف عبدالباقى يقدم “أحسن صاحب” ضمن قادرون باختلاف بحضور الرئيس السيسي

قدم الفنان أشرف عبدالباقى فقرة بعنوان: “أحسن صاحب” لدمج القادرون باختلاف في مصر.

قال عبدالباقي، خلال حفل “قادرون باختلاف” بحضور الرئيس السيسي:”مبادرة أحسن صاحب .. كلنا عندنا أصحاب، من واحنا في الدراسة والشغل ، لكن القادرون باختلاف إيه الاختلاف في أصحابهم؟، يبقا لهم أصحاب جيرانهم وزمايلهم ..أحسن صاحب مش عاوز منه حاجة بيستفيد منه ويفيديه.

وقدم عبدالباقي نموذجين من القادرون باختلاف، قائلا: “معانا أكتر من نموذج لأصحاب.. ياسين سنة أولى إعدادى وعنده 12 سنة، وإبراهيم صاحبي وابن عمى وخالتي..رد إبراهيم، صاحبه من 12 سنة وأقربله“.

أضاف الفنان أشرف عبدالباقي، النموذج الثانى، هو عمرو درويش معاه 2 بكالوريوس تجارة والمعهد العالي للفنون المسرحية، والذى قال: “أنا جبت العكاز علشان أتحرر من التزام ماما بتوصيلى للمدرسة فى ابتدائي وإعدادي وروحت الثانوى بيه.

صاحب عمرو ويدعى أحمد قال: “عمرو صاحبي بقاله 20 سنة.. اتعرفت عليه في أولى ثانوية كنا في مدرسة في شبرا.. من قبل فرحي بيوم ماسبنيش وكان أول واحد اذن لبنتي في ودنها. .وكمان وداني حمام شعبي قبل فرحي“.

ومازح أشرف عبدالباقي عمرو قائلا: وديته حمام شعبي، ليرد عمرو بقوله ضاحكا: ” صاحبي ووجبت معاه“.

في نهاية الفقرة أعرب عبدالباقي عن امنيته في ان يضم حفل العام القادم من “قادرون باختلاف” أصحاب كتير وأحسن أصحاب.

يذكر أن مبادرة “أحسن صاحب” هي مبادرة عالمية تهدف لإنهاء العزلة الاجتماعية والاقتصادية للقادرين باختلاف من خلال تنمية العلاقات بين أشخاص لديهم إعاقة وأصحاب ليس لديهم إعاقة.

وتأثر الرئيس عبد الفتاح السيسي، عند حديث الفنان أشرف عبد الباقي، عن دعم الرئيس عبد الفتاح السيسي لـ”قادرون باختلاف”.

الرئيس السيسي عن أمنيته فى العام الجديد: “ما بقاش ليا حاجة شخصية وربنا يعينى

قدم الإعلامى إبراهيم فايق، فقرة “إسأل الرئيس” خلال الحفل.

قال فايق: “سعيد وبتشرف إن أقف قدام سيادتك وسعيد بسعادة الأولاد وبستمد منهم طاقة الأمل، وقد إيه مبسوطين ومتحمسين إن النهاردة يومهم وهيقفوا قدام حضرتك، فخور إن بلدى ورئيس بلدى استطاع يغير فكرة ومسار لحد ما بقى عندنا قادرون باختلاف وتميز كبير“.

سألت الفتاة فرح محمد الكومى عن أمنية الرئيس السيسي في العام الجديد.

رد الرئيس السيسي قائلا: “أرحب بيكم كلكم أهلا وسهلا اللى موجودين وبطلب منكم تسألونى أسئلة سهلة.. واللى فى مكانى ده ميتنماش غير كل خير لبلده علشان يقدر يلبلهم ويحقق لهم كل اللى نفسهم فيه.. وعلى المستوى الشخصى مبقاش ليا حاجة شخصية وربنا يعيني ويوفقني”.

الرئيس السيسي: “أصعب موقف عدى عليا كان فى 2011.. كنت ببكى على مصر”

سأل الشاب رامز من “قادرون باختلاف”.. 17 عاما فى الثانوية العامة ولديه قدرة على مونتاج الصور والفيديوهات، سؤالا للرئيس عبد الفتاح السيسي: “ازيك يا فخامة الرئيس.. ممكن تقولى أصعب موقف عدى على حضرتك خلال التواجد فى القوات المسلحة”؟.

ورد الرئيس عبد الفتاح السيسى على السؤال: “أصعب وقت عليا كان فى 2011.. والله يعلم ما فى نفسى فى اللى انا بقوله ده.. انا كنت ببكى على مصر يا بني.. كنت ببكى على مصر.. حسيت أن ممكن أن الأمور تخرج عن السيطرة والبلد تخش فى دوامة كبيرة جدا من الخراب والدمار.. وكنت عارف أن عدد مش قليل وظروفنا صعبة.. وتدخل فى أمور زى كده.. وكنت حاسس بالخطر الشديد.. ومن ساعتها لغاية دلوقتى بدون مبالغة.. وأنا فى الوقت ده مكنشى باين عليا سن خالص.. أنا بكلمك بجد.. هاتوا صورى فى الفترة دى قبل 2011.. سنى لا يتخطى 30 عاما.. لكن اللى حصل والخوف على البلد والناس“.

وتابع الرئيس السيسي: “أكثر حاجة صعبة أنك تشعر أن أهلك وناسك ممكن يضيعوا وأنت مش عارف حاجة.. وفيه ناس كتير فى مصر وفى الجيش عندهم القلق والخوف أن الأمور تخرج وتبقى فيه حاجة صعبة لمصر.. لكن وانا بقولها بعد أكثر من 10 سنوات“.

وأكمل الرئيس السيسي: “لازم تعرف.. اللى حمى مصر ربنا سبحانه وتعالي.. وأنا من الناس اللى ممكن شايفين حجم الدمار اللى البلد تدخل فيه لسنين طويلة.. 20 و30 و40 سنة الله أعلم.. محدش حمى البلد إلا ربنا.. البلاد اللى جبنا دخل ومش رجع.. بلدنا ظروفها أصعب.. ولو كان حصل شكل من أشكال الاقتتال.. فى 2012 و2013.. نقدر نقول أن الجيش والشرطة والدولة دفعت ثمن كبير اوي.. طب أنا تقديرى أن ربنا حمى البلد حبا وتقديرا لمصر وشعب مصر.. الحمد لله أنه نجانا من ده كله وعداها بسلام.. وان شاء الله تبقى بفضل الله اللى جاى أفضل أن شاء الله”.

الرئيس السيسي عن طفلة غالبها النوم بحفل قادرون باختلاف: مستنى وممكن أقعد ساعة

داعب الرئيس عبدالفتاح السيسى، الإعلامى إبراهيم فايق، خلال فقرة “إسأل الرئيس” بعدما غافل طفلة النعاس، قائلا: “لو بنتنا اللى نامت.. سبها هى مع ربنا بقا.. وأنا مستنى.. ممكن أقعد ساعة“.

وقالت الطفلة تاليا خلال حفل قادرون باختلاف: “ازى حضرتك يا فخامة الرئيس صباح الخير..ورد الرئيس: صباح النور على البنور.

وسألت الطفلة الرئيس قائلة: “بسأل الرئيس: حضرتك عندك أحفاد؟ ازاى بتعقد معاهم وسط المشاغل“.

رد الرئيس: “أيوه عندى أحفاد ويوم الجمعة بعد الصلاة بتغدا معاهم فى الغالب وبيبقا فيه فرصة أتكلم معاهم وأقعد معاهم”.

الرئيس السيسي: بلدنا قدمت 3 آلاف شهيد وبنقدم لهم كل التحية السلام

وجه الشاب عمرو عيد من “قادرون باختلاف”.. 17 سنة وبطل سباحة وفى الثانوية العامة ومحب للتكنولوجيا، سؤالا للرئيس السيسي: “صباح الخير يا ريس.. أنا عاوز اقولك أنى سعيد وفخور أنى أمام حضرتك.. أمتى حضرتك خوفت أوى على بلدنا؟“.

وجاوب الرئيس السيسى قائلا: “بشكرك يا عمرو وفخور أنى اقعد معاكم.. وهقولك على حاجة كنت مأخرها لما أطلع أتكلم.. ولما لقيت حد بيقول “بقى لينا مكان”.. كأنى رجل كبير بفكر فى الدنيا التانية.. يوم القيامة ولقاء ربنا سبحانه وتعالي.. فى اليوم ده صدقنى وبكرة تشوفوا يوم اللقاء.. احنا اللى هنقول يا رب.. احنا لينا مكان معاهم.. لو قولتم اه هنيجي.. ولو قولتم لا.. هيبقى موقفنا صعب“.

وتابع الرئيس السيسي: “الخوف على مصر دائم.. لكن فترة 2011 و2013 و2013 و2014.. ولما حصل الموجة الكبيرة من الإرهاب.. وتفجير الكنائس والمساجد ومديريات الأمن.. الوقت ده كان أى حد يشوف مصر يقول خلاص.. مش عاوز الذكريات تانى نفتكرها ونخلى بالنا.. ولو ليا كلمة حافظوا على البلد دي.. وفيه شهداء.. فيه شهداء ضحوا بحياتهم من أجل البلد.. 3 ألاف شهيد و12-13 ألف مصاب واصابات مؤذية.. دى ناس غالية علينا قدمت حياتهم.. ونوجه التحية والسلام إلى الشهداء.. ونقول لأسرهم.. لا مش هننسى ولن ننسى الشهداء.. ولكم الأجر الكبير فى تقديم أبنائكم شهداء للحفاظ على الدولة المصرية “.

الرئيس السيسي مازحا مع أحد الأبطال طلب اللعب بالأهلى: ما تدخلنيش مع النادى والخطيب

أعرب محمود أحمد بطل مصر فى ألعاب القوى، عن أمنيته فى الانضمام للنادى الأهلى.

رد الرئيس السيسى مازحا: ” مدخلنيش مع الأهلى والخطيب يا محمود.. وزير الشباب بيقولى سهلة أن شاء الله“.

عن رسالة الرئيس السيسى للكرة المصرية من أجل الوصول إلى كأس العالم، سأل محمود الرئيس السيسى ليرد بقوله: ” سؤال مهم جدا..ما تدخلنيش فى الكرة..مفيش حاجة أبدا تقدر تتحقق من غير جهد وإصرار.. انتوا مثال وأسركم قالت لا هنبذل جهد ومُصرين على بذل الجهد علشان تبقا موجود واسر كتير مجتلهاش الفرصة تبقا موجودة هنا.

أضاف الرئيس السيسي: “الكورة مش لعبة.. والكورة الدنيا كلها بتحب تلعبها وتحب تتفوق فيها.. لو عاوزين فى مصر؟ هل معندناش شباب من 105 ملايين منهم 60% شباب؟.. لا عندنا.. بش مهم قوى نشوفهم ونعرف نختارهم وندربهم.

تابع الرئيس: “اللعيب يجب أن يعرف أن الرحلة طويلة محتاجة جهد كبير فى الملعب ومع نفسه علشان يحقق ده، لكن المسألة مش بس مدربين كويسين أو توفير ملاعب كويسة.. الموضوع متكامل بين الدولة والاسر والشباب اللى ممكن يلعبوا اللعبة دى لو قدرنا نعمل كده فعلا الأولاد والبنات اللى يقدروا يلعبوا نديهم الفرصة ويدبروا هنقدر نوصل ونعمل حاجات كتير”.

الرئيس السيسي: أكثر حاجة بتفرحنى مشاركتى فى يوم “قادرون باختلاف”

سألت الشابة رحمة من “قادرون باختلاف”، الرئيس عبد الفتاح السيسي، قائلا: “صباح الخير يا ريس.. أنا عندى 20 سنة طالبة أكاديمية الفنون.. بمثل وبغني وبعمل استعراض.. ونفسي أكون ممثلة مشهورة.. بحبك يا ريس.. ربنا يكرمك ويسعدك ويخليك لينا.. اللهم أمين يا رب العالمين.. إيه أكثر حاجة فرحتك يا ريس.

أجاب الرئيس السيسي على سؤال رحمة  قائلا: “اليوم ده أكثر حاجة بتفرحني وبيكون يوم جميل.. ومش بفرح بمزاجي أنا بفرح معاكم.. وأنا بلاقي نفسي فرحان بيكم.. ربنا سبحانه وتعالي بيجعلكم فرح.. لو الناس تعرف هتلاقيهم وقفوا وأنتوا نازلين على السلالم.. والعربيات تقف وأنتوا بتعدوا.. دى حكمة ربنا.. الفرحة الكبيرة جدا بتاعت اليوم ده.. بخرج كأنى اتغسلت”.

الرئيس السيسي يكشف عن دعائه اليومى: “رَبِّ قَدْ آتَيْتَنِى مِنَ الْمُلْكِ وَعَلَّمْتَنِى مِن تَأْوِيلِ الْأَحَادِيثِ”

تحدث الشاب عاصم من “قادرون باختلاف” مع الرئيس عبد الفتاح السيسي قائلا: “صباح الخير يا ريس.. أنا عندي 15 سنة.. طالب في ثالثة إعدادي .. بطل جمهورية في السباحة وبلعب في نادي الزمالك.. بغني وبمثل وعازف الكمان وإنشاد ديني وأحفظ القران بالتلاوة.. وسؤالي: “ايه الدعاء اللى حضرتك بتدعيه كل يوم“.

أجاب الرئيس السيسي، على سؤال عاصم قائلا: أنا بدعي كتير.. “رَبِّ قَدْ آتَيْتَنِي مِنَ الْمُلْكِ وَعَلَّمْتَنِي مِن تَأْوِيلِ الْأَحَادِيثِ ۚ فَاطِرَ السَّمَاوَاتِ وَالْأَرْضِ أَنتَ وَلِيِّي فِي الدُّنْيَا وَالْآخِرَةِ ۖ تَوَفَّنِي مُسْلِمًا وَأَلْحِقْنِي بِالصَّالِحِينَ“.

وشارك الشاب عاصم في تلاوة آيات من القرآن الكريم أمام الرئيس السيسي، مستعرضا قدرته في حفظ القرآن بدقة كبيرة.

الرئيس السيسي يرد التحية على شابة من “قادرون باختلاف” بلغة الإشارة

عبرت الشابة ضحي من “قادرون باختلاف”، عن سعادتها بلقاء الرئيس عبد الفتاح السيسي بلغة الإشارة، ورد عليها الرئيس التحية بنفس الطريقة.

وقالت الشابة ضحي بلغة الإشارة وفسرها الإعلامي إبراهيم فايق: “الصم والمكفوفين والإعاقة الحركية وكل القادرون باختلاف فى مصر.. هل المواصلات الجديدة هتكون متاحة لهم ومجهزة؟“. 

أجاب الرئيس عبد الفتاح السيسي بالقول: “مش بس المواصلات وكل المدن الجديدة اللى بنعملها حريصين أن نحقق فيها المعايير تسهل وتيسر لكل القادرين باختلاف .. الحركة بسهولة.. هل اللى بنعمله جوه القاهرة.. كل شيء ممكن يوفر وييسر كل أبناء القادرين باختلاف”.

الرئيس السيسي: الدستور والقوانين حصن “القادرون باختلاف”

قال الرئيس عبدالفتاح السيسي مازحا: “هنحاسب بتوع التربية الرياضية وبتوع الإعلام.. وهيبقا يوم النهاردة”.. جاء ذلك ردا على حديث محمود أحمد بطل مصر في ألعاب القوى، بشأن حرمان القادرون باختلاف من الانضمام إلى كلية الاعلام والتربية الرياضية.

وأضاف الرئيس السيسى قائلا: ” لا ميرضنيش ..الكلام اللى بتقوله مهم قوى.. ومن كام يوم كنت بقول أن الدولة مبتعتمدش في إدارتها على الأماني والنصح وتوجيه الكلام ولكن تدير أمورها من خلال قوانين ونظم في كل شيء.. طيب نناشد فلان يعمل أو ناس تخلى بالها.. الدولة بتعمل قوانين تؤمن الأفكار اللى بتتكلم فيها، وماشيين في ده، وده مشوار مش قليل، لأن حجم القوانين مش بس للشباب والشابات البرلمان يتصدى ليها.. فيه في الدستور والقوانين تحصين للقادرون ونسبة معينة من الوظائف في الدولة وقطاع حكومي وخاص وفى كل حتة“.

وتابع الرئيس حديثه لمحمود: “متتألمش من موضوع الكلية.. هنشوف مع وزير التعليم العالى إيه الحكاية.. محتاجين نبقا كلنا مع بعض”.

الرئيس السيسي لـ”قادرون باختلاف”: كنت بحب مادة التاريخ بتخليك تعيش زمانين

وجه الطفل صلاح من “قادرون باختلاف”، سؤالا إلى الرئيس عبد الفتاح السيسي: “احب اصبح على سيادة الرئيس.. انا صلاح محمد صلاح عندى 8 سنوات وفى 2 ابتدائي.. وبلعب ألعاب قوى وسباحة فى نادى بهتيم.. وعندى 11 ميدالية.. وسؤالى للرئيس ايه أكثر مادة كنت بتحبها فى المدرسة؟“.

أجاب الرئيس عبد الفتاح السيسى قائلا: “أكثر مادة كنت بحبها هى التاريخ.. التاريخ مليان دروس ومواعظ كتير.. المادة اللى كنت بحبها اوى كانت التاريخ.. ليه التاريخ؟.. وكل القراءة كانت فى التاريخ.. ده عبارة عن أنك عشت زمانين.. الزمن اللى عشت فيه وزمان اخر بتقرأه حتى لو كان فيه أخطاء.. وكنت بحب التاريخ”.

وقال الطفل صلاح للرئيس السيسي: “نفسى اطلع تيته عمرة ودى كانت أمنية جدى قبل وفاته”، ليرد عليه الرئيس السيسي: “حاضر يا صلاح”.

الرئيس السيسي:”والله السعيد اللى هيقدر يقف جنب القادرون باختلاف”

وجه الرئيس عبدالفتاح السيسي، التحية والتقدير لأسر قادرون باختلاف، قائلا: “كل التحية للأسر الأب والأم، لأن أنا أب وعارف كويس قوي اللى عنده أسرة بيبقا مهتم إزاى وبيشيل همهم جدا في كل شيء.. وفيه ناس كتير جدا بيفكروا لما نبقا مش موجودين في الدنيا هما هيعملوا إيه والأمر يمتد أكتر للقادرون“.

وتابع الرئيس: “بقولهم متشكرين وكتر خيركم وربنا يعينكم ويكافئكم على اللى انتو بتعملوه وهتعملوه لأبناءكم”.

وجه الرئيس كلمته للشعب المصرى قائلا: ” لكل إنسان بيسمعنا دلوقتي.. عاوزين نخلى بالنا من بعضنا.. ودايما إن قدرنا نعمل حاجة حلوة نعملها ومتستقلش العمل ده.. حد بيعدى وأنا موجود فى الشارع.. لو اللى بيعدى محتاج حد يساعده .. لو كل الناس جريت عليه علشان تعمل كده تفتكر حد الفرحة اللى هتخش عليه..احترام وتقدير وقبول والموضوع اكبر من كده وخليك أكثر إيجابية وسعة ورحمة عطاء كبير.. بقول الكلام ده، والله بحلف، السعيد اللى هيقدر يقف جنب القادرون“.

وتابع الرئيس: “كان فيه أيام النبي عليه الصلاة والسلام صحابي اسمه جليب.. كان فقير جدا وضعيف وكان شكله ملوش حظ يعني.. فكان ده مقدر عند النبي محمد صلى الله عليه وسلم.. وكان معندوش حاجة يلبسها لكنه كان مقدر.. الدرس ان النبي لما كان بيقربه كان بيعلمنا التقدير للضعاف واللى ظروفهم ليهم حظ عند ربنا.. والحظ ده يوم القيامة.. ومفيش حاجة مخلوقة في الوجود كده.. والملك ليه صاحب.. رب العباد شايف كل حاجة وبيطلع عليها“.

واصل الرئيس: ” كلام كتير قوي لما بلاقى مواقع التواصل بتتكلم.. بتتمنى يكون فيه حاجات كتير تساعد الآخر.. قادرون خطوة قليلة قوى.. ولو عملنا هنعمل حاجة جميلة على الأسر، لأنهم لما بيلاقوا أن المجتمع بيمارس الحب بيبقا سعيد هو كمان”.

الرئيس السيسي يلتقط صورا تذكارية مع المشاركين فى حفل “قادرون باختلاف

حرص الرئيس عبد الفتاح السيسي، على التقاط صور تذكارية مع الأطفال والشباب المشاركين في فقرة “اسأل الرئيس”، ضمن فعاليات النسخة الرابعة من “قادرون باختلاف”.

الرئيس السيسي مهنئا الفنان حسين الجسمى بعقد قرانه: “ألف مبروك”

حرص الرئيس عبد الفتاح السيسي، على تقديم التهنئة إلى الفنان حسين الجسمي، بمناسبة عقد قرانه قائلا: “مبروك.. ألف مبروك.. واحنا سعداء بوجودك معانا.. الإمارات شعب حبيب“.

ورد عليه الفنان حسين الجسمي قائلا: “دى أغلى مباركة.. المصرى مش يتقال له لا.. ومصر حلوة بيكم“.

وشارك الفنان حسين الجسمي فى تقديم فقرة فنية، ضمن فعاليات النسخة الرابعة من “قادرون باختلاف”، بحضور الرئيس السيسي.

الرئيس السيسي يدعو قادرون باختلاف لافتتاح قاعة فنية بالعاصمة الإدارية

مازح الرئيس عبدالفتاح السيسي، الفنان القدير محمود حميدة عن دوره في مسرحية، حيث كان رافضا مشاركة طلاب المدرسة في أعمال فنية، قائلا: ” يا أستاذ محمود هي مش ناقصة أنك تعادي الفن كمان“.

قال الرئيس: “اسمحولى متمشوش من فضلكم انتظروا بشكركم جميعا ..حاجة جميلة جدا ودخلتم البهجة علينا كلنا ومصر واللى بيتفرج علينا بره مصر“.

وأضاف الرئيس: “بشكركم وبشكل عام كل من ساهم في العمل ده.. وبنتفرج على الأصوات الجميلة اللى احنا سمعناها ..هو ده المثل اللى احنا بنقدمه للناس علشان تاخد بالها“.

أكمل الرئيس: “بشكركم كلكم .. التحية والتقدير ليكم جميعا لهنا واستاذ حسين ومحمود وبدعوكم للعاصمة الإدارية الجديد.. عاملين فيها مدينة للثقافة والفنون وفيها قاعة جميلة لم تفتتح.. أتصور المفروض ما نخشش القاعة دى إلا بيكم.. الاحتفال ده أنتم إن شاء الله تفرجوا الدنيا كلها على مصر.. متشكر جدا”.

الرئيس السيسى يلبى طلب الطفلة “جودي” بالتقاط صورة تذكارية

حرص الرئيس عبد الفتاح السيسي، على تلبية طلب الطفلة “جودي”، من “قادرون باختلاف”، بالتقاط صورة تذكارية، وصعد الرئيس السيسي إلى منصة المسرح لالتقاط صورة مع المشاركين في العرض الفني.

وقال الرئيس السيسي: يطيب لي، ونحن على أعتاب عام جديد أن أتقدم إلى الشعب المصري العظيم، وجميع أبنائي وبناتي من النشء والشباب وأخص منهم ذوي القدرات والهمم، بالتهنئة بحلول العام الجديد مع تمنياتي الصادقة، بأن ينعم الله “عز وجل”، على مصر وشعبها بالخير والنماء الدائمين.

تابع الرئيس: أقول لكم بصدق، إنني أنتظر هذه المناسبة، عامًا بعد عام، لأشارك معكم هذا التقليد السنوي نستلهم منكم الطاقة الإيجابية، والإرادة القوية وروح التحدي، ومشاعر الفخر والاعتزاز فخرًا بهذا الوطن، الذى أصبح حريصًا على تكريم أبنائه من ذوي الهمم ويرى فيهم النبتة الصالحة، التي نزرعها لنحصد من ورائها خيرًا كثيرًا لنـــا جـمـيـعـًا وللأجيــــال القادمــــــــة، بــــإذن الله واعتزازًا بكم، أبنائي وبناتي من ذوي الهمم، كونكم أصبحتم تمثلون أحد أهم آليات بناء هذا الوطن نقدر جهودكم وإنجازاتكم، ونرى في إسهاماتكم في شتى المجالات، أيادي بيضاء، يزداد عمق أثرها وتأثيرها، يومًا بعد يوم، في سعينا نحو بناء دولتنا العصرية الحديثة ونحافظ بكم ومعكم على هويتنا المصرية الوطنية الأصيلة.

أكد الرئيس السيسي أن الظروف الدقيقة، التي يمر بها العالم خلال الآونة الأخيرة قد خلفت أزمات اقتصادية متلاحقة، وفرضت تحديات جسيمة جعلتنا ندرك يقينًا، أن الالتفاف حول الوطن، والاستقواء بمكتسباته التاريخية ومقدراته الإلهية، هي السبيل الوحيد ليس فقط للعبور من تلك الأزمات ومواجهة التحديات، بل لتحقيق حلم بناء الدولة المصرية، وفق ما نصبو إليه ونحلم به.

أوضح الرئيس السيسي: لقد أدركنا منذ الوهلة الأولى، وطوال سعينا في هذا الطريق، أن مقدار النجاح ومعدلات الإنجاز، مرهونة بالأساس، بما يمكن أن نقدمه لأبنائنا وبناتنا من ذوي الهمم، وهذا ما جعلنا نحرص عليه دائمًا، ونعمل على توجيه جميع مؤسسات الدولة المعنية، للعمل على تقديم يد العون والمساعدة في مواجهة تحدياتكم، وتوفير البيئة المناسبة، لتمكينكم من المشاركة الفعالة، وتعظيم إسهاماتكم والاستفادة من قدراتكم، في مختلف مسارات العمل الوطني.

استكمل الرئيس: أود أن أغتنم هذه الفرصة، لأوجه جميع الجهات المعنية بالدولة، للعمل على استكمال ما بدأناه معًا من خلال تعزيز البرامج والخطط، واتخاذ ما يلزم من إجراءات تنفيذية تستهدف تمكين ذوي الهمم، ودمجهم في جميع المشروعات والمبادرات القومية التي تقوم الدولة بتنفيذها ولتصبح جهود تمكين أبنائنا وبناتنا من ذوي الهمم جزءًا أساسيًا لا يتجزأ، من الأولويات التي تستهدف الارتقاء بحياة المواطنين.

وأعلن الرئيس السيسي عن بعض الإجراءات التنفيذية التي وجه مختلف مؤسسات الدولة بها، خلال الفترة المقبلة:

أولًا: تكليف وزارة التضامن الاجتماعي، لتيسير إصدار كارت الخدمات المتكاملة لذوي الهمم ضمانًا لحصولهم على كافة الحقوق والخدمات ودراسة صرف معاش الوالد، للمرأة من ذات الهمم المتزوجة، أسوة بباقي الأشخاص ذوي الهمم.

ثانيًا: تكليف وزارة الشباب والرياضة، بدراسة عمل عضويات وإتاحة الاستخدام، لأبنائنا وبناتنا من ذوي الهمم، لكافة مراكز الشباب، ومراكز الابتكار الشبابي والتعلم، والمدن الشبابية، والتنسيق مع الأندية الرياضية، من أجل ضمان إتاحة الممارسة الرياضية لهم وفقًا لأفضل الأطر التي تتيحها تلك المنشآت الرياضية، والتوسع في مجالات التدريب والتأهيل لذوي الهمم لتشتمل على مختلف المهارات الحياتية والفنية والثقافية والرياضية والاشتراك بفاعلية في أنشطة الكشافة والجوالة.

ثالثًا: تكليف وزارة الشباب والرياضة أيضًا، بتكثيف الدعم الموجه للاهتمام بقطاع البطولة الرياضية وتكثيف الأنشطة والمشروعات المعنية، باكتشاف الموهوبين والمبدعين من ذوي الهمم في مختلف المجالات وتوفير برامج وأنشطة مخصصة لذوي الهمم، تستهدف رفع لياقتهم البدنية، وصقل مهاراتهم الرياضية، وتشكيل الفرق الرياضية منهم.

رابعًا: تكليف وزارة الإسكان، بمراعاة الاحتياجات الخاصة بذوي الهمم، فيما يتعلق بمشروعات الإسكان ويتم تحديد نسبة لهم، ضمن الأولويات التي يتم تخصيصها ووفقًا للضوابط الخاصة بالمشروعات المطروحة حاليًا، في مختلف المدن الجديدة مع توفير كود الإتاحة، في المنشآت العامة والسكنية.

خامسًا: تكليف وزارة الصحة، بإتاحة مختلف الخدمات الصحية المتكاملة لذوي الهمم، في جميع الهيئات العلاجية في مختلف المحافظات وإتاحة خدمات مرافقة إضافية، للمرضى من ذوي الهمم في العناية المركزية، إذا تعذر التواصل مع المريض.

سادسًا: تكليف وزارة النقل، بمراعاة تضمين المشروعات الوطنية، التي يتم تنفيذها حاليًا، من طرق وكباري وأنفاق ومحطات للمترو والمونوريل وغيرها بأكواد الإتاحة ولكافة المتطلبات والاحتياجات المجتمعية، الخاصة بذوي الهمم.

سابعًا: تكليف وزارات التربية والتعليم، والتعليم العالي والشباب والرياضة والتضامن الاجتماعي بالتنسيق معًا، لإطلاق مبادرة رفقاء “قادرون باختلاف” في المدارس والجامعات ومراكز الشباب والأندية، ودور الرعاية ومختلف الهيئات على أن يقوم مجلس الوزراء، بوضع آلية تنظيمية لتحفيز المواطنين، على قيامهم بالاشتراك في هذه المبادرة.

ثامنا: تكليف وزارة القوى العاملة بالتنسيق بين أجهزة الدولة المعنية، لصياغة برامج تستهدف تدريب وتشغيل الشباب من ذوي الهمم لصقلهم بمتطلبات سوق العمل، في مختلف قطاعات التشغيل مما يفتح لهم آفاق المستقبل.

وجه الرئيس السيسي كلمته لأسر وأولياء أمور أصحاب الهمم، قائلا: “لا يمكن أن تفي كلمات الشكر، وعبارات التقدير، ما قدمتموه لأبنائنا وبناتنا من ذوي الهمم، من رعاية شاملة ومساهمتكم بهذه الرعاية المقدرة، في نهضة هذا الوطن وأعدكم بأننا سنظل حريصين على بذل كل جهد ممكن، من أجل تحقيق التمكين الذي يليق بكم..وفقنا الله جميعًا، إلى ما فيه الخير، لهذا الوطن العظيم.

الرئيس السيسي يوجه بتخصيص صندوق جديد لذوى الهمم.. ويجمع مليار جنيه

تحدث الرئيس عبد الفتاح السيسي، عن إنشاء صندق لدعم ذوي الهمم، قائلا: “بنتكلم عن صندوق ذوي الهمم .. معالي المستشار رئيس البرلمان نعمل قانون ننظم بيه الموضوع أكثر ويكون فيه مصادر للصندوق أكثر.. علشان تقدر تعمل خدمات أكثر.. وأنا من كام يوم بنتكلم عن الصناديق“.

أضاف الرئيس السيسي: “بطلب دعم الهيئات دي.. صندوق هيئة قناة السويس يطلع 100 مليون.. صندوق الشهداء والمصابين 100 مليون.. صندوق الرعاية الصحية يطلع 100 مليون.. وصندوق الإسكان يطلع 200 مليون.. والفريق محمد زكي الصندوق بتاعكم يطلع 500 مليون جنيه”.

الرئيس السيسى لـ”قادرون باختلاف”: “ما تحرموناش من دعواتكم الطيبة”

طالب الرئيس عبدالفتاح السيسي، فى ختام حفل قادرون باختلاف، بالدعاء، قائلا: “كل سنة وأنتم طيبين وسعداء بيكم .. وما تحرموناش من دعواتكم الطيبة .. شكرا جزيلا”.

الرئيس السيسي والدكتور مصطفى مدبولى ووزيرة التضامنالرئيس السيسي والدكتور مصطفى مدبولى ووزيرة التضامن
الرئيس السيسي ووزير الرياضةالرئيس السيسي ووزير الرياضة
الرئيس السيسي يرحب بطفلة من ذوى الهممالرئيس السيسي يرحب بطفلة من ذوى الهمم
الرئيس السيسي يشهد الحفل السنوى لـ قادرون باختلافالرئيس السيسي يشهد الحفل السنوى لـ قادرون باختلاف
حفل قادرون باختلافحفل قادرون باختلاف
ذوو الهمم يستقبلون الرئيس السيسيذوو الهمم يستقبلون الرئيس السيسي
طفلة من ذوى الهمم تعانق الرئيس السيسيطفلة من ذوى الهمم تعانق الرئيس السيسي
مصحف للرئيس السيسيمصحف للرئيس السيسي
من الحفل (2)من الحفل (2)
من الحفلمن الحفل
وردة للرئيس السيسي من طفلةوردة للرئيس السيسي من طفلة

التعليقات مغلقة.