ضعف السمع الحسي العصبى المفاجئ ….الاعراض…. وطرق العلاج
من الاسم هو عرض بيحس فيه المريض “فجأة” فى خلال أيام بانه مش بيسمع…
“مرة مريض قالى انا صحيت من النوم حسيت ان ودنى اليمين مسدودة تماما حتى لما باخبط بصابعى قدام ودنى اليمين مش باسمع …انما قدام ودنى الشمال باسمع عادى”
المريض كلامه كده جاب م الاخر:
انه حصل فجأة
انه ضعف فى العصب مش مجرد التهاب فى الاذن الوسطى او ماية ورا الطبلة (زى ما بيتقال) لانه لما يخبط قدام ودنه مع وجود ضعف توصيلى الصوت ح يكون اعلى مش اقل م الودن التانية…
الاعراض:
– انك تحس فجاة بان السمع قل
– انك تيجى تحط التليفون على ودنك تحس ان الصوت ضعيف و الكلام مش متفسر زى قبل كده بكام يوم
– ممكن يحصل معاه طنين او وش
– ممكن يكون معاه دوخة او عدم اتزان
– فى حالات مش قليلة بيحصل بعد دور بــرد
طيب نعمل ايه ؟!!
ضعف السمع الحسي العصبى بيعتبر م الحالات الطارئة يعنى لازم تتوجه فورا و ما تتأخرش للطبيب المختص علشان تبدأ العلاج فورا…
– بتروح تكشف عند طبيب السمع و الاتزان
– و التشخيص بيتأكد عن طريق:
اختبار ضغط الاذن اللى بيستثنى وجود اى التهاب او ماية فى الاذن الوسطى
و اختبار رسم سمع و اختبار كلام: الاختبارات دى بتقيم العصب السمعى و مدى قدرتك على تفسير الكلام فى كل أذن على حدة.
و لو فعلا ثبت بالاختبارات انه ضعف سمع حسي عصبى مفاجئ بيتم توجيه المريض لطبيب الانف و الاذن علشان نبدا العلاج فورا
العلاج:
العلاج بيكون عن طريق الكورتيزون اللى بيتاخد اقراص او حقن مباشر فى الاذن و اللى بيحدده طبيب الانف و الاذن على حسب الحالة الصحية لكل مريض.
بعده كده:
بعد كورس الكورتيزون لو كان اقراص او بعد كل جلسة حقن فى الاذن بنكرر رسم السمع علشان نشوف التحسن و لو فى حاجة لجرعة تانية او لا…
الضعف الحسي العصبى المفاجئ مش صعب بس عامل الوقت 
فيه هوا أهم حاجة كل ما تم التشخيص و العلاج بدرى خلال ايام من حدوثه كل ما كانت النتائج احسن.
فيه هوا أهم حاجة كل ما تم التشخيص و العلاج بدرى خلال ايام من حدوثه كل ما كانت النتائج احسن.مع خالص الامنيات بدوام الصحه والعافيه.
د.نهلة جاد
استشارى السمع والأتزان تشخيص وعلاج امراض السمع والأتزان وتأهيل
مرضى الضعف السمعى بجميع انواع السماعات وزراعة القوقعه .
العاشر من رمضان
مول المصريه الكويتيه امام نقابة المهندسين الدور الأول
