يخوض الشاعر والمؤلف أيمن بهجت قمر سباق دراما شهر رمضان 2020، بمسلسل “فلانتينو” الذي يقوم ببطولته الفنان عادل إمام، وكطبيعة أي عمل فني قد يلاقي بعض الانتقادات والآراء السلبية وأخرى إيجابية.
وتعليقًا على التعليقات السلبية التي يتلقاها قمر ويحذفها من حساباته عبر مواقع التواصل الاجتماعي كتب عبر حسابه على Facebook: ”بخصوص الناس اللي بتقوللي أنت ليه بتمسح الآراء السلبية وبتسيب الآراء الإيجابية بس أقولك أنا .. مبدأيا أنت بتدخل عند مؤلف العمل في صفحته الشخصية المؤلف اللي تعب وشقي وأخلص وبيبقى مستني كلمة طيبة”.
تابع: ” لو ما عندكش قول .. بس قول في صفحتك عند أصحابك في المواقع الفنية أو قول حتى بعد فترة لمراعاة مشاعر الناس .. ازاي عايزني اسيب كلام يشوه العمل اللي أنا كاتبه وفي ظل بعض الناس اللي بتاخد بالسمع وتردد”.
أكمل أيمن بهجت قمر: “أنت مش متخيل الشعور السيء اللي الواحد بيحسه من الكلام البايخ ده .. كأنك رايح فرح وبتقول للعريس عروستك مش حلوة، غير إن أنت ممكن كمان تغلط في ممثل هو عندي هنا على الصفحة وبتحرجني وبتحرجه وممكن تجرحه ..أنت لو محاسب وحد دخل قال عليك محاسب وحش ..لو محامي وقال عليك بتخسر القضايا .. لو دكتور وقال عليك ما بتعالجش حد قدام الناس على الفيس بوك”.
اختتم قمر: “.قوللي بأمانة بيبقى إحساسك إيه ؟ حس بالناس حقيقي تصرف بايخ وسخيف وشرير كمان بالذات مع الكلام الخارج عن الأدب أو المقصود، فلتقل خيرا أو لتصمت”.
مسلسل “فلانتينو” بطولة عادل إمام، داليا البحيري، ودلال عبد العزيز، وعمرو وهبة، ورانيا محمود ياسين، وبدرية طلبة، وهدى المفتي، وسليمان عيد، وحمدي الميرغني، وعدد كبير من الوجوه الجديدة، وتأليف أيمن بهجت قمر، وإخراج رامي إمام.
تدور الأحداث حول “نور عبد المجيد” الشهير بـ “فلانتينو” يمتلك مدارس إنترناشونال هو وزوجته، وتدور خلافات بينهما مع مغامرة ومفاجآت.